56岁的瑞伟前年在《城寨英雄》饰演绝世高手，估咗好耐仲做埋大Boss，嗰阵有一幕影住佢爆衫露出一身完美肌肉，结果惹大家嘅惊叹，大家都赞佢keep得好，宝刀未老！

连带欧瑞伟喺《爱．回家》饰演贱精律师KC都有话题，赞佢够晒抵死。甚至还穿美少女水手装校服反串女人，大玩男男SM情节，几搞笑！

可能佢本人都估唔到，一个麻甩佬，同另一个麻甩佬Terry（李伟健）跳手指舞会咁多人Like。

旧年欧瑞伟在《同盟》再演好打得嘅角色，饰演忠心护主保镳易先生，佢同令小姐（鲍起静）关系微妙，最后为咗保护令小姐惨死一幕，搞到大家个心碎晒。

而呢套剧亦令佢有份提名今年大台颁奖礼嘅男配角奖，同喺《爱．回家之开心速递》饰演大小姐嘅林淑敏一样，都系大热门人选！

近日欧瑞伟接受传媒访问，讲到今次得奖信心，佢话：「冇，真系冇信心，不过知道咁多人锺意我做嘅角色，当然觉得开心，亦都好多谢大家支持！」之后佢仲话睇好陈山聪可以攞奖。

虽然山聪旧年在「TVB马来西亚星光荟萃颁奖典礼2017」中获得男配角，但系佢接受访问，讲到有冇信心再下一城嘅时候，佢好坦白话：「边系我呀，今年竞争好激烈，个个对手都好劲，所以我喺大马拎到已经好满足，其实真心今年已经超出我预期，已经大丰收，所以平常心面对！」山聪亦话睇好欧瑞伟，一定支持《同盟》！

大家都知欧瑞伟做龙虎武师出身，有个行船爸爸，读左派学校香岛，读书嗰阵已是体操好手，学校重点栽培，欧瑞伟就专攻跳马。加上生得都算靓仔，走去做替身，化埋妆，做刘德华替身，嗰阵仲系八十年年代之初。讲多次，系八十年代初。

做龙虎武师做到月入三万，仲系三十年前，但刘德华一份Form改写咗欧瑞伟嘅人生。份form系无线演员进修班报名表，让欧瑞伟转行做演员。毕业后第一个剧系85年吕良伟曾华倩版本《雪山飞狐》鬼见愁。

之后欧瑞伟一路都系拍古装，形象正气，常演忠义英雄。资料显示，佢拍第二套剧《神剑魔刀》已经系第一男主角，《达摩》都系第二男主角——第一男主角系饰演达摩嘅吕良伟。

87年，无线开拍大型古装剧《大运河》，梁朝伟刘青云陈玉莲曾华倩。欧瑞伟算系第二男主角，同饰演李世民嘅刘青云平分春色。当时青云配华倩，欧瑞伟衬出炉电视小姐冠军王绮琴。

95年欧瑞伟去大马发展，娶埋当地一线花旦做老婆，婚后生一子一女。00年返无线，已经系配角，甚至只是客串。去到04年拍《大唐双龙传》，又做李靖，但对手已由梁朝伟刘青云变成林峯吴卓羲。但欧瑞伟继续敬业乐业，严谨过严谨。

当年《寻秦记》中的陶总管令人印象深刻，戆戆直直又好打得，对住滑头嘅项少龙，完全招架不住。《寻秦记》已经系2001年之作，陶总管入咗行都成32年。

资料显示拍过100套剧，系100套，唔系100集。

虽然欧瑞伟已56岁，但近几年仍塑造一个个让人印象深刻的角色，一次次给观众带来惊喜，希望佢能得奖啦！